العالم عندك غموضه كل يوم بيزيد وانا مش عارف اوصل، كل يوم بقرب فيه من نفسي ببعد عن عالمي، الحكاوي والحواديت خلاص فقدت بريقها مش قادرين نفهم اننا ممكن في يوم نشعر بالملل من حياتنا ومن أجسادنا، كل يوم ممكن في وقت معين الأمساخ بتبدأ تظهر وتتعرى قدامنا.
مش قادرين نتفهم قد ايه عوالمنا السوداء ممكن بتكون افضل من تلك الحياة الخضراء!!!
اليوم اللي فات واللي قبله واللي قبله كلهم بقوا شبه بعض ممكن الألوان تكون موجوده بس احنا اللي عيوننا اصابها السُعر فبقينا بنشوف أبيض وأسود، لكنه في النهاية مفيش الوان شايفينها حتى متعة الأبيض والأسود اختفت، السيما والموسيقى والقهوة طعمهم بقى بايخ جداً لإنهم فقدوا روح المغامرة اللي كنت بخوضها عشان أقدر افوز بيهم.
من كام يوم لما شفت الشبح اللي غاب كتيير ومش هستفسر عن السبب ممكن يكون الحياة أبيضت اكتر او ازدادت بريقاً لكنها متلونتش برضه، قولت ان الأمور هتتعدل وهشوف النور تاني بس حتى بصيص الامل اختفى مفيش فايده، لكن اللي نقدر نطلع بيه اني اتغيرت فقط في مود الاغاني!!! انتي عارفة طبعاً اني مش بسمع غير منير لكن الاغنية المفضلة اتغيرت المرة دي بقت ( هون يا ليل).
يا رب نلاقي المواصلة اللي نقدر نوصل بيها لبوابتنا المفضلة، الهاجس عندي ممكن يكون اقوى وأنا حواسي مش بتخيبني ابداً!!
